Inruolkhai taka mipui le inrawnkhawma hmalak ka tum: Ngursanglur Sanate
Kum 2022 Manipur Assembly Election-a Tipaimukh Constituency MLA thar Pu Ngursanglur Sanate le Pu Robert L Sungte hai titina (interview) chu Hmasawnna Thar/Hmarram.com tiemtu hai hmu thei dingin vawisun hung insuo a ni a. Thil pawimaw tam tak umsien khawm, hun tepter tak kara buotsai a ni lenin, biel mipui in an MLA thar ngaidan le a hmathlir hai – a pawimaw bik zuol – an hriet theina dingin ti’n indawnna pasari siem a nih. Chuonghai chu:–
- Kum 2022-a Manipur Assembly Election (Tipaimukh biel) a danglamna bik rieu nia i hrietna san hai.
Pu Ngursanglur: Pathien le biel mipui ditsakna zarin hlawtlingna tum hni ka lo chang ta a. Kum 2022 Manipur Assembly Election danglam bik rieu nia ka hriet tamtak lai thenkhat chau a tawi thei angin hril ka tih. Pathien zarin mipui thlawpna ka dawng a. Pawl thenkhata inthawk chengrang le dona tuok langkhawm Hmarram a sietna lai siem that nuomna lungril neia mipui a bikin thalai a za tel mi thlawpna kha hlu le ropui ka tia. Hmarram mipuiin buoina um loa India danpuiin chanvo a pek anga zalentaka ditthlang thei dinga hmalatu Hmarram Kohran Inzawmkhawm (HKI), khawtlang ṭhuoitu, nunghak tlangval hai inpekna kha kum dang term dang hai neka danglam biek rieuna niin ka hriet. Chun, hril hmai thei lo ding pakhat chu kohran mihai hmun hran hrana inthawka Pathien kuoma an mi ṭawngtai pekna hi a nih.
- Parbung khawsung lampui blacktop la ni lo hi MLA ei nei hlima inthawka khan hril a ni rawp hlak a. I term sung hin iengtinam hi kawngah hin hma lak i tum a?
Pu Ngursanglur: A ni ngei, ka khawzawl a ni el baka Tipaimukh biel sawrkar office tamtak innghatna a nia. A khawsung lampui MLA election tawm ruoia siem tuta chawlsan la ni mek chungchang hi ngaipawimaw um khawp el. Tiena tlanga inthawk pi le pu, mi hmasa hai kha indo hnam an lo ni leiin ral laka an him theina dingin lampui sir paw an lo rin hlak an tia. Chuleia, Parbung khawsung khawm lampui dit lo khawm lo ni mei an tih. Amiruokchu, pi le pu hai hun a liem ta a. Digital khawvel hmasawnna kalpen ruola hmasawn nuom ei nia. Parbung khawsung lampui siemna mawphurtuhai kuoma lampui chawlsan a nina san hriet phawt a. A tul anga mipui le hmalak ning a tih.
- Hmar bubitna le khawvela MLA pakhat ei hnam in a neina Ruonglevaisuo (Tipaimukh) biel ah hin fak le dawn zawngna kawngah iengtinam mipui hai hmakhuo sawkzangkhai i nuom a?
Pu Ngursanglur: Hmar bubitna khawvela MLA ni hi mawphurna a rik hle a. Kum 10 liemta sung khan sawrkar ngaisak hlaw zo lo ni inlakhawm, biel mipuihai hin an kut inrimra ngei fain vawisun chen khawbu ei la hluo ve a. Sawrkara biel mipui aiawtu dinga thlang ka nina angin sawrkara mipui chanvo scheme hai sukpuitling a ni theina dingin mipui le thawtlang ning a ta. Kum liemta haia NFSA hnuoia bufai le SK Oil Tipaimukh biel mipui chanvo sem mumal loa um hai dam hi Kristien rama ding chun mak ka tia. Chuleiin, Tipaimukh biel mipui a dawngtu ding haiin an chanvo ang an hmu theina dinga sukhmasawnna lampui mipui le dap ning a tih.
- Rethei, hmeithai, tar le ruol ban phak lo inchuklai hai tadinga sorkar scheme tam tak a um a. Iengtinam hma lak nisien a hmu ding hai popo in dawng thei an ta?
Pu Ngursanglur: Sawrkar hin nu le pa’n nau a hmangai le a duot angin a mi enkawl a. Rethei, hmeithai, kum upa kum 60 chungtieng le ruolban lo hai ṭhangpuina inenkawlna ding thangpuina a siem a. Sienkhawm, Tipaimukh biela a dawngtu ding haiin ei hmu phak ngai naw leia thangpuina um lo anga ngai pawl ei la um. Tar pension tia ei hriet lar, Old Age thangpuina lem hi chu Ṭuithaphai lai mimal pension book kawltu an um an tih. Hieng ang thil indik lo ei rama um hi a dawngtu ding haiin an chanvo ang an dawng theina dinga mipui le hmasuon ning a tih.
- Term hmasa-a i tling ṭum khan miṭhenkhat hril dan in, “Vangai tieng a uksak nawh” an ti hriet ding a um zeu zeu hlak a, tuta ṭum hin biel pumpui tadingin iengtinam hma lak dingin insingsa a?
Pu Ngursanglur: An ri nazawng hi mazu a ni nawh. Tulai Social Media ei inhnel nasa a. A hmang thiem tamtak an um laiin thil indik naw an hriet zing khawm mipui laia a ni naw zawnga hril nuom pawl hi an lo um ve a. A dum khawm an ṭan pa’n a var ti ro a ti chun a var an ti el hlak. Chuleiin, butak khuka khukpui le ngaisak tlak lo tamtak hi mi pangngai chin hin chu thudik le thukhel thlier hran thiem a tul. Biel mipui popo MLA ka nina angin inruolkhaitaka mipui le inrawnkhawma hmalak ka tum.
- Pherzawl District headquarters Pherzawl le khuo dang haia sorkar thawktu, mani postingna hmun a um lo, hai hi an office kaina ding ngeiah an um theina dingin hma lak ngam chi a ni hmel am? Mipuiin an thlawp theina ding che in I ngaidan, I hmu dan le I hmalak nuom dan mi hril pek raw aw.
Pu Ngursanglur: Mitinin chan ṭha chu ei dit seng a. Manipur hnam 33 ṭawng dang hmang seng ei um a. Mani hnam ṭanghmasiel seng ei ni bawk. Chu laia tlangmi le phairam mi innek zing ei ni bawk. Tuta ṭum MLA ka hlawtling hma khawma Pherzawl District sukvulna ding le sawrkar thawktu an thawkna hmun senga an um theina dingin ngaituona, tha le zung ka lo seng ve hlak. Hnam hmathlirna neiin ka theitawp insuo zawm pei ka ta. Ei lungril ditzawng ang mi pe phal dingin mipuihai thlawpna le ma loa Pathien kuoma mi lo tawngtaipui dingin ka ngen.
- Pherzawl District mipui haiin damnaw nia an bel tak Parbunga damdawiin hi full-fledged Pherzawl District Hospital nisien ti chu nang khom I duthusam a ni ngei ring a um a. Amiruokchu, vawisun chen hin infrastructure khawm a tha tawk naw a. Iengtinam hospital/healthcare chungchangah hin hma lak I nuom a?
Pu Ngursanglur: A ni ngei, Tipaimukh biel Medical ngirhmun hi ka mimal ngei khawma ka ngaipawimaw hle a. MLA ka ni naw lai COVID-19 hri inleng lai khawm damdawi ka thei ang tawk inchawin Tuolbung khuo a kei ngei zu fein mipui kuoma sem a ni hrim a. Parbung CHC bika Medical Staff (manpower) khawm CHC staff um ding ang zat khawm an um nawh. Tipaimukh biel ngeia inthawk khawm Medical Minister khawm ei lo nei ta. A danglam chuong nawh. Sienkhawm, Hmarram mipui ta dinga mi thahnemngai, ei hnam sunga mithiem le chinchang hrie hai le inrawn zinga a ṭul ang peia thaw tlang chu ka tum dan a nih.
Clip from Hmasawnna Thar, March 20, 2022.
Recent Comments