HMAR FOLKTALE: SAWRLAI TIENAMI LE TULAI KHAWVÊL

Ziektu: Dr Lal Dena

Thuhma:  Hmar Folktales I tiem hlak am? Tienami mei mei tiin ngainêp naw rawh. Tulai khawvêla thilthar ei hmu tam tak hai hi ei pi le puhai khan an ngaituona khawvêlah an lo nei vawng tah. Chulaia ṭhenkhat chauh Sawrlai chanchina inthawkin lasuok ei tih.

Sawrlai chanchin a tawi thei angin: Tienlai hin Sawrlai, lal naunu hmêl ṭha tak el hi a um a. A pa chu Lalhmang, ṭapa (salruol) pasari a nei a; ama hi a naupang tak dawt  a nih, a naupang tak chu Tlumte a nih.  An hausak zie chu khawvêlin a pêk thei nei naw hrim hrim an nei nawh.  An in khawm a ropui êm êm a, bang thuo riet nei a nih. Chu in chu sȗng tienga inthawkin puotieng mi an hmuh thei a, sȗng tienga inthawk chauhvin kawtkhâr-hai thu ringawtin hawng el a nih. Khawvêl hausakna nei naw an nei naw leiin, sal sarihai le an pa chun arasi lâk tumin vân chung sângah an inkâp kai. Tlumte chu vâna inthawka hung ṭumin, an lal in kawtkhâr  bula ngîrin, “Ka u, Sawrlai, kawt mi hung hawngpêk rawh” tiin fâk ding a zu lâk hlak.

Ni khat chu Sawrlai le Tlumte kawtkhâr bula an inthla liem lai Vawmpahrawng (Khawhri)-in a lo hmuh a, Sawrlai chu a ngaizâwng tah. Sawrlai-in insȗnga inthawkin a hmêl lo hmuh-in kawt a hawngpêk ngai nawh. Sienkhawm Vawmpahrawng-in hmeithainu hril angin Tlumte zunhîng kâr khat a’n hnam hnungin a râwl chu Tlumte râwl ang a hung nih a, a hmêl khawm Tlumte hmêl ang a hung nih tah. Sawrlai-in Tlumte sâwnin kawt a lo hawngpêk le inruolin Vawmpahrawng chun ram hla taka a vuong  hmangpui tah.

Tlumte bu la dingin a hung ṭum nâwk. Vawitam Sawrlai ko sienkhawm dawnna a um tah nawh, insȗng a lut thei tah bawk nawh. Lahmang le a nauhai a upa taka inthawkin an thalpuiin kawtkhâr an kâp hawng.  Sienkhawm thal infuon leiin pakhat khatin an thi pei. A tâwp taka Tlumte-in a thalpui a hei kâp nâwk a, kawtkhâr parietna chu a kâp hawng a, ama chauh a dam. A pa le uhai ruong chu a upa indawtin â’n zâltir tah a. Khawsâwt le beidawngin an in chunga a kai a. Ṭap pumin Pathien a ko, a dang a châr êm êm. Chulai tak chun vâna inthawkin ruomal ang a bau takah a hung tlah a. Chuphingleh, Tlumte chu vate’n a’n chang tah a. Ram hla taka um, a unu Sawrlai a va zawngsuok. Vawmpahrawng-in nuhmeiin a lo nei tah. Vawmpahrawng chun Sawrlai chu a thurȗk, a hringna chu zarluonga bâwm sȗnga vaṭhu a nih ti hai a hril vawng a, lova sinthawin a fesan hlak. Vawmpahrawng um naw kâr, Tlumte le Sawrlai-in zârluonga vaṭhu manin an lo vuong hmang. Vawmpahrawngin a hnawt. Sawrlai le Tlumte’n vaṭhu kehai an herbawng, Vawmpahrawng kehai a bawng, ana chu a la hnawt pei. Vaṭhu thlahai an herbawng hnung khawmin Vawmpahrawngin a la hnawt pei, a man ṭêp. Sawrlaihai unau chun, “Chunga Pathien, Manmasi nauhai kan la dam, mi san rawh!” ti’n an khêk a.  Pathien chun, “Vaṭhu rîng kha herbawng ro” a zuk ti a. Vaṭhu rîng an herbawng le inruolin Vawmpahrawng chu a thi tah a. 

Sawrlai-hai unau chun rampuia situi thienghlim ruotheiin an hung chawi a. Rampui laia hnathielhna thienghlim vate êk khum lo pasari an hung chawi bawk a. An lal ina an pa le uhai situi thienghlim the khumin an keitho nâwk a, hlim takin  an um nâwk tah a nih.  

1. Râwl lâk hlâwn theina (Calling bell) an lo nei tah: Ei tulai khawvêla in ropui le in sâwngsâng hmu ding tam tak a um. Sienkhawm bang thuo riet nei ruok chu hmu ding a la um nawh. Sawrlai-hai in hi a ropuiin a lien hle. A ropui bîkna chu bang thuo rieta sa, thuo tina kawtkhâr um pei a nih. Salruol raldo le ramsuoka an fe châng: “Sawrlai, kawt hung hawng rawh” ti’n damte’n an hei ko hlak. Bang thuo rieta sa nisienkhawm Sawrlai-in a na bula hril angin a lo hriet nghâl hlak. Chu umzie chu kawtkhâr bangah thilri/râwlri hriet lâkhlâwn theina hmangruo an sie tina a nih. Chuchu tulai ṭawngin calling bell ei tih.  An changkâng khawp el. Eini digital age-a um hai kum zabi 21-naah hin calling bell hmang dân ei hriet chauh a nih.  
2. Remote control khawm an lo nei tah: Sawrlai-in râwlri a hriet charin ṭhung pumin “Kawthai lo inhawng ro” a tih a, bang thuo rieta kawtkhârhai chu automatic-in a hmatiemin an inhawng el hlak. A ṭawngbauah khan thilthawtheina (magnetic power) a um a; tulai ṭawnga remote control ei ti ang hi a nih. A hming an la hriet nawh a chu remote control ang hmangruo chi khat chu an lo nei daih tah. Chuongang hmangruo siem theina (technology) khawm an lo nei daih tah. An lo ropui hle. Pipu suilung mâwl ei ti thei nawh.
3. CCTV ang deuh khawm an lo nei tah: Tulai  khawvela chu in le hmun pawimawhaiah Close Circuit Telivision (CCTV) sie vawng a ni tah. Entirna, ATM booth-haia CCTV inbȗk vawng a nih. Sawrlai-hai in ropui zuol nâwkna chu puotienga mi lâwn invâkhai khawm insȗnga inthawkin an lo hmu thei hlak. Vawmpahrawng khan Sawrlai hmêlṭhat zie a hmuh a, nei nuomin vawi tam va lêng a tum hlak. Sawrlai-in insȗnga inthawkin tuollaia um Vawmpahrawng chu a lo hmuh hlak  a, kawt a hawngpêk nuom ngai nawh. Vawmpahrawng khan Tlumte hmêlput le râwl a nei hnung khan, Sawrlai-in kawtkhârhai kha a hawngpêk chauh a nih.
4. Architech le Engineer thiem filawr an lo nei tah:  Vawisȗn hin khawvêl thiemna le technology hmasâwn leiin in ropui tak tak hmu ding a tam tah. In sâwngsâng lem chu Dubai le rambung tam taka hmu theiin a um. Sienkhawm Sawrlai-hai in anga bang thuo riet le kawtkhâr automatic-a hawng le khâr thei hi hmu ding a la um nawh. Ei pi le puhai ruok chu chuongang in ropui design le bâwl thiem architect le engineer thiem filawr an lo nei daih tah. An technology khawm a lo insâng, hmusit chi an ni nawh.
5. Ei pi lu puhai kha rocket-in vân sângah an lo inkâpkai daih tah: Ei pi le puhai kha scientific knowledge le astronomy tienga an lo insângzie hrilin a siek nawh. Khawvêl hausakna po po neitu an nih a. Chuleiin Lalhmang le a nau pasalhai chu zan khat meeting neiin an inrâwn a, an agenda chu, “Chungtienga arasihai hluo dân a nih”. Ieng hmangruo (spaceship) am an hmang ei hriet nawh. Sienkhawm vân boruokah châwllâwkna (spacestation) an hang indina, chutaka inthawk chun arasi hluo dân an ngaituo a nih.  Tulai hnai el chauh khan USA, Chinese le Russian scientist-haiin thlâpa le sikeisena lȗt tuma inbuotsaih an nih. Hmar pi le puhai chun khuo ṭawiṭima an lo um laia inthawk ta khan space exploration thaw thei a nih ti hi an lo hriet daih tah, an hmathlîr a lo advance veng veng ngawt el. 
6. Pathien Iengkimthawthei um an ring: Ei pi le puhai kha thingbul lungbul bie ringawt chu an nih nawh. Iengkimthawthei khawvêl le a sȗnga um hai po po siemtu umin an ring a. Lirhnîng le sietna râpthlâk an tuok pha, “Chunga Pathien, hnuoia Pathien, zangai, zangai, Manmasi nauhai kan la um ie” an ti hlak. Sawrlai le Tlumte Vawmpahrawngin a hung hnawt a, chungtienga an Pathienin, “In vaṭhu kha, a rîng herbawng ro” a zuk ti a. Vaṭhu rîng an her bawng le inruolin Vawmpahrawng chu a thi tah a. Pi le puhaiin Iengkimthawthei Pathien an ring kha tuta ei Pathien tho hi a nih naw maw?. Tuta ei Pathien khawm hming dangin ei ko chuong nawh. Pi le puhaiin Pathien an ringdân (concept of God) le ei ringdân a danglam chuong nawh. Pielrâl khawm pielrâl ei ti ve tho.
7. Thonâwkna thuthlung khawm an lo ring: Sawrlai le Tlumte khan rampuiah situi thienghlim ruotheiin an hung chawi a, rampuia hnathielhna thienghlim vate êk khum lo pasari leh. An in an hung tlung khan an pa le an uhai ru kha a upa taka inthawkin hnathielhna pasari chungah an sie a. Situi thienghlim kha ruong chungah hai chun an zuk the a, ruhai chu an hung châng sup sup tah a. A vawihninaah situi chu an zuk the nâwk a, ruhai chu taksa putin an hung um nâwk a, an ṭhung sup el tah! Vawithumnaah tui thienghlim an zuk the nâwk a, ruonghai chu an hung insim phur phura, an hung tho nâwk vawng tah! Kristien thuring laia pawimaw tak pakhat chu thonâwkna thuthlung hi a nih. Mihriem hi thi inla khawm, la thonâwk thei ei ni ti hih ei pi le puhai chun an lo ring daih tah ti Sawrlai tienami hin a sukchieng.
8. Khawvêl hi suol le ṭha indona a nih: Hmar tienamihaiah misuol le miṭha, lal suol le lal ṭha, khawhri le mihriem inkawpna chanchin tam tak a um. Sawrlai chanchina Vawmpahrawng hin Setan ân entir. Setan tirko khawhrihaiin mihriemhai hlim taka an um ding hi an thîk a, an phal ngai nawh. Sienkhawm a tâwpa khawhrihai hnein an um hlak.  Sawrlai chanchin hi khawvêl hi suol le ṭha indona ram a nih a, a tâwpa thudik chu hnetu a nih hlak ti sukfietu ṭha tak a nih.

Thu khârna: Hmar tienami-hai hi tienami mei mei an ni nawh, inchȗk ding moral lession tam tak a um. Mihriem hringnun thubul inthup (philosophy of human life) tam tak ân phȗm. Kristien ei ni hma daih, Sinlunga inthawka pi le puhai hung thlangtlâk pei laia hieng tienamihai hi ṭawngbauva an hung inhlân sâwng pei a nih. Ei rohlu laia pawimaw êm êm, ei history ziek ṭhat nâwk (reconstruct) theina ding khawma innghatna tlâk oral source pawimaw tak an nih. Chubâka ei tienami-hai hin tȗ’m ei nih (identity) mi hriltu ṭha tak an nih.

(C) 2021 Hmasawnna Thar/Hmarram.com

Comments

comments