WATKIN R. ROBERTS A CHANCHIN LE RAWNGBAWLNA

WATKIN R. ROBERTS A CHANCHIN LE RAWNGBAWLNA
(September 21,19886 – April 20,1969)

By Rev. Lalneikhup Hmar; Sielmat, February 5, 2022

Watkin R. Roberts, “Pu Tlangval” ei ti hi September 21, 1986 khan Caernarvon, Northwest Wales ah vantlang ve tak sungkuoa pieng le seilien a nih. Anni chu congregationalist kohran member, sakhawmi tak an nih. Sungkuo maicham, Bible study thawa tawngtaina ngaina mi an nih.

An sungkuo inkhawmna hai a chun a nu-in khawvel ram dang danga missionaryhai rawngbawlna chanchin a tiempui hlak a. Chanchinṭha la hrenawhai kuoma Pathienthu hril a ṭul zie a hril rawp hlak a. Mission fielda rawngbawlna chungchang hi an sungkuo titina tak a ni hlak. Chu chanchin chun Watkin R. Roberts lungril a hne thei hle a nih.

Watkin R. Roberts chun thuhriltu R.A Torrey sermon a tiem hlaka, chu taka inthawka Pathien le intuok an nih. Pathien le an intuoka inthawk chun a hringna thlakdanglamin a um a. James Gilmour lekhabu China le Mongolia rama rawngbawlna chanchin chu lunglut takin a tiem hlak a. Gilmour anga missionary a fesuok nuomna lungril a hung nei pha tah a nih.

Watkin R. Roberts chu tleirawl a ni a inthawkin Caernarvon a lung-lekha chosuokna (slate mining) hmuna sinthaw hlak a nih. Chuonglai huna ding chun lung-lekha chu sumdawngna hlawk tak, mitin inhnar a nih. Roberts chu a sinthawna le sumdawngna tieng a hlawtling ta hle a. Nisienlakhawm, fesuoka ramthima rawngbawl nuomna lungril a put zing a. Thlarau bohmanghai hmangaina inthuk tak a nei zing hlak.

Wales Revival (1904-1905):

Watkin R. Roberts hringnun le rawngbawlna chosuoktu tak chu Wales revival hi a nih. Wales a chun revival a tlung rawp hlak leiin “Revival Ram” tia ko hiel a ni hlak. 1904 a revival chu ropui le danglam tak a nih. Mipuihai lai suol inhrietna le simna dam, thlarau tienga hartharna nasatak an chang le ruolin thlarau bohmang dinghai invawina nasatak an neitir a. Roberts lungril hnetu tak chu Evan Roberts le R.B. Jones thuhril a nih.

Keswick Convention (1906-08):

India ram le Hmarsak tienga rawngbawl dinga Watkin R.Roberts inpensuoktirtu tak chu Keswick Convention a nih. Watkin R.Roberts chu Keswick convention ah ṭum thum zet (1906,1907,1908) khan ṭhang a. Convention thupui pawimawhai chu (1) Ringtuhai hnetu nina dam; (2) Hringna inthuk lem nei dinga Pathienthu ril tak tak inchuktirna dam; (3) Khawvel hmun tum tuma inthawk missionaryhai report ngaithlak a ni hlak.

Thuhriltuhai chun mipuihai lai chona an siem hlak a. India rama rawngbawlna tul zie hrilin “Assam le Northeast India rama hnam za tamtak chu Isu hreloin thim hnuoiah ah lan thung zing a nih” ti a hriet chun a lungril a ver hle a. Walsh ram maksana rawngbawl dinga pensuok nuomna lungril a nei pha tah a. Convention a chun Rev. D. Llyod Jones le Dr. Peter Fraser hai leh mimal takin an hung inhmel hriet a. Rawngbawlna hmangruo tangkai tak ni dinga a hriet leiin hun iemani chen chu Liverpool ah fein pharmacy a damdawi tieng thil an chuk hlak a.

Wales suoksana Northeast India tieng a hung suokdan:

Walsh Calvinistic Methodists’ Foreign Mission Society in Dr. Peter Fraser chu Aizawla Medical Missionary dingin a tir a. Watkin R. Roberts chu India rama rawngbawl nuom a nih ti hrein Dr. Peter Fraser chun a fiel ve a. Watkin R. Roberts khawm rawngbawl dingin a fe ve nuom a nih ti Mission hotu haiin an hriet chun inhmaw loa la nghak hri phawta Dr. Peter Fraser hai hnunga fedan pangngaia la fe ve dingin an hril a. Amiruokchu, Watkin R.Roberts chu anni ruola fe ve nghal dingin an siem ta lem a.

October 14, 1908 khan Watkin R. Roberts chu Dr. Peter Fraser le D.E. Jones hai nupa leh a ruolin India ram pan dingin Wales an suoksan tah a. Tuipui chungah chawlkar thum vel lawnga an chuong hungin tlang lampui seitak hung hrawin December 9, 1908 khan Aizawl, Mizoram an hung tlung a nih.

Watkin R. Roberts hin danglamna tamtak a nei a. Ei ramah rawngbawl dinga a hung hin tlangval kum 22 vel mi chau a nih a. Pastor a ni nawha, Kohran Upa khawm a ni bawk nawh. Hlaw neia suma ṭhangpuitu ding mumal tak a nei nawa, innghatna ding kohran iengkhawm a nei nawh. Hi lei hin harsatna tamtak a tuok a nih. Tu chunga khawm innghat lova Pathien kut chau ringsana rawngbawl (faith mission) a hung a nih.

Aizawla Watkin R. Roberts Rawngbawlna:

Watkin R. Roberts hi a piengna le seilienna insung hrima inthawk ringtu tha tak a nih a. Bible study le evangelism a inhnik mi a nih. Missionary a fesuok a tumna leiin pharmacy le damdawi tieng Liverpool inchukna iemani tawk a nei bawk a. Chu chu Dr. Peter Fraser rawia Aizawla medical centre (dispensary) a damdawi semna kawngah a hmang tangkai hle a hril a nih. Aizawl khawpuia le a puotieng, abiktakin Hmarbiel tieng chen mihai dawrna remchang a hung nih a. Damdawi semsuokna chu gospel track semna remchang tak a hung nih a. Aizawl a tlung a inthawk thla ruk hnungin a ruol pakhatin thangpuina sum tlawmte an hung thawn a. Chu sum chun Chanchinṭha Johan lekhabu James H. Lorrains le Savidge haiin Lushai tawnga inlet Chanchintha Johan lekhabu inchawknan a hmang a. Chu lekhabu chu Senvawn lal Pu Kamkhawlun kuomah a thawn a. Chu rawngbawlna fethlenga dawnna chu Senvawn a Chanchintha hung lutna hmangruo a ni a nih. Pu Kamkhawlun chun chu lekhabu chungchang chu hrilfie a, Pathienthu hril dingin a ko a. Chu kona chu dawn dingin ruol pahni (Pu Thangkhai le Lungpau) lampui hriltu dingin Aizawla inthawkin an suoka February 5, 1910 khan Senvawn a tlung a nih. Senvawna chun Lushai ṭawngin Johan 3:16 tiemin Pathienthu a hril a nih. Hi hi Senvawn le ei rama Pathienthu hung lutna hmasataka hril a nih.

Hun fepeiin Watkin R.Roberts rawngbawlna le mission chu nasatak a hmasawn mek lain dodalna nasatak a tuok bawk a. A kohran phunhai takngiel khawm awp lum theiloin a hung um tah a, Manipura inthawkin hnawtdawk-in a um a. A ruol tamtakin an maksana, thu khelin an heka, America tienga Mission hotuhai chenin an hung ban tah a. Mani inzawng chawpin a uma, kohranhai ralkanga inthawkin a enkai a hung tul a.

1929 khan India ram maksanin America tieng a kir nawk a. 1932 khan Toronto Canada tieng umna nghet neiin a um lem tah a. Ama khawsakna ding le ei rama a kohran phunhai Pastor, Teacher le evangelist hai enkawlna dingin pharmacy chikte a hawng nia hril a nih. Canada ram ah a taksa um sienlakhawm a lungril ruok chu a kohran phunhai lai a um zing hlak a. A taksa kum 70 a ni hnung, 1957 khan kohranhai kan dingin a hung inzin nawk a. Kum upa tak la ni naw sienkhawm a harsatna le rinum ruorna leiin a kum neka upa lema inlang niin hril a nih. Lakhipur ah January 25-26, 1957 khan General Assembly hmangzoin Churachandpur tieng a hung inzina, hi hi kohranhai hmel a hung hmu tawpna tak alo ni tah a. “Lal hna I thawk zel ang u” ti hi a thucha nuhnung tak a nih. Watkin R.Roberts chu kum 87 mi a niin April 20, 1969 khan Florida hmunah a thi tah a.

Rawngbawlna Entawn ding ṭhenkhathai:

1) Medical Ministry:

Dr. Peter Fraser inrawina hnuoia Medical Ministry an thaw hi entawn tlak tak a nih. A ram mipuihai pawimawna hnuoi hrût phak tawka rawngbawlna a nih. Tawngbaua Pathienthu hril ringawt niloin mipuihai taksa le thlaraua mamaw pe thei zet rawngbawlna a nih. Ei Lalpa Isu khawmin ama ringa hnungzuituhai tlasam le phingtama an um ding a phal naw leiin a zirtirhai kuomah mipuihai “fak ding” pe dingin a hril a nih (Mat.14:16).

Natna tinrenga na le damnaw tinrenghai damdawi pea tawngtaina an nei hin taksa le thlarau tieng damna chen an tlun pha a. Dispensary hung pantu damnaw le sawmdawltuhai kuomah Pathienthu hril theina remchang a siem a. Khawsung le puotieng ral ram hla tak taka inthawka damna beiseia hunghai kuomah Pathienthu an hril hlak a. Damdawi pana hunghai chu mani khuo tieng an kir nawk pha gospel track inphurtiriin, damdawi chawina bur/theikhuong a chen Pathienthu ziekin a thawn hlak. Vawisuna MRH&RC le BSSC rawngbawlna hai hi Chanchintha thedarna hmangruo tangkaiin ieng tinam siem thei ei ta? Iengtinam Nurse inchuklaihai Medical Missionary dingin siem thei ei ta? BSSC hmanga ei rawngbawlna hi suikir nawk hlak ei tiu. Aims & objectives ei neihai kha iengtinam sukpuitling thei ei ta? tia ngaituo a hun ta hle.

2) Small Group Ministry:

Dr. Peter Fraser rawia “Kraws Sipai” an indin hi Chanchintha thedarna hmangruo tangkai tak a nih. Aizawla dam, Mizoram sevel khuoa hai le Manipur Sinthlang tieng chen Kraws Sipaia inpe hai chun hlaw neilovin volunteer tak takin a pawl a inzin suokin Pathienthu an hril hlak a nih. Team ang zawnga thangruola evangelism rawngbawlna fepui ding ei nih ti a min chuktir. Land & building le project ei thaw hai hi tangkai tho sienkhawm Gospel Volunteer ang zawnga rawngbawlna fepui ding ei nih. Chanchintha hril dingin mipui le a pawl thahratna hmang thiem inchuk a pawimaw hle.

3) Literature:

Watkin R. Roberts hi literature tienga inhnikna nei mi a nih. Literature hi rawngbawlna pawimaw tak nia a hriet leiin mani inchuka thiem a nih. Mani kuta thiem inchukin lekha kuta hersuok printing press angawm siemin Pathienthu sutdawkna khawlin a hmang hlak. Chanchintha thedarna Journal pawimaw tak “Kristien Tlangau” dam siemin Editor hmasatak niha hril a ni nghe nghe a. Pathienthu thatak tak zieka rawngbawl hi hmangruo tangkai tak ienglai khawm ni zing a tih. Literature hi silaimu ang a nih. Sermon inring taka khek chu a ri are theia, ziek ruok chu ari re sienlakhawm a tlo lem a nih. Mani mit ngeia lekha tiem hin lungril a hnein a nghet lem a nih.

Vawisun hin Chanchintha-in a mi chenchilna kum 112 zet alo tling tah a. Chanchintha ei kuom a hung tlung theina dingin Wales ram inhawi tak maksain Watkin R.Roberts a hung a, ama chun rinumna tinrêng tuorin chavai takin um sienlakhawm ama leiin vawisun hin kohran angin ei ngir thei tah a. Kum 112 sung hin Kohran haiin iem ei thaw a? ti chu hun in la hung hril a tih.

Chanchintha hril neka mani ta dinga biekin ropui bawl ringawt ringtu ei ni el dim? Eita ding chun ringtu ni hi anhawi ngei el. Mi tamtak chun an hun awl a chau, an inhman chang chau rawng bawl an tum niin an lang a. Tuorna, channa nekin hlawkna, ropuina tehlem hnawt ei tam lem niin an lang.

Rom 10:13-15 chun, “Tukhawm lalpa hming lam taphawt chu sandamin um an tih” ti a nih. An leh, an iawinaw chu iengtinam lam an ta? A thu an ihriet naw chu iengtin am awi an ta? Thuhriltu um loin iengtin am hrieng an ta? Tir an ni naw chun iengtin am thu hril an ta?” tiin ziek a nih. Tuta mission fielda um tirkohai hi ei aia hriltu dinga ei tir hai an nih. Hriltu dinga tir/fe an ni leiin mawphurna lientak an liengko ah an nghat a. Anni chu kohranhai ta dinga hrilna rawl an nih. A tirtu nang le keiin hin mawphurna lien tak ei nei bawk a. Chanchintha miin an hriet theina dingin baua hril a tul phawt a nih. Chanchintha hrila um zuitu ding chu ziek le tiem a nih. Ei lungrila sukdettu/chawmtu chu thu le hla (literature) a nih.

Pu Tlangval rawngbawlna mission policy pathum ei tarlang hai a inthawk khin inchuk ding tam tak ei hmu ngei ka ring a. Chanchintha chu kawng dang dang le hmangruo dang dangin hril inlakhawm baua, ri neia ngeia Chanchintha hril dinga Pathienin a lo induonglawk a nih. An hriet hnunga ringna le thlaraua inthanglienna dinga tul makmaw chu ziek le tiem (literature) hi a nih. Kristien inthanglienna dinga pawimaw tak chu ziek le tiem hi a nih. Tirko Paula chun Timothe kuomah “ka hung hmakhat chu tiem dam, thuhril dam, inchuktir dam thaw rawh” tiin a ziek a nih (1 Tim.4:13).

 760 total views,  2 views today

Comments

comments

Leave a Comment

Your email address will not be published.

Start typing and press Enter to search

Jai Hmarram!