Silchar ah Assam sawrkar le Hmar Inpui hrietpui ‘Sikpui Ruoi’ hmang

Hringchar/Silchar: Dec. (Mimtukthla) 5, 2019 (Ningani) zing dar 8:00 AM khan Pu Raltawnluoi Intovate, Chairman, Hmar Welfare Society, Silchar (HWSS) in Hmar mipui le mi pawimaw 30 bawr vel hma-ah Assam sawrkar le Hmar Inpui (Hmar Supreme House) hrietpui December 5 – Sikpui Ruoi le inzawmin Hmar hnam puonzar (flag) khaipar meuin Hmar pi-le-pu ha’n Hringchar an lo ti hlak Silchar khawpui-a Pu Raltawnluoi Intovate a in SMC&H compound ah ursuntaka hun hmang a nih.

Hun hmasa takah Pu Laldawnlien Tuolor, Secy., HWSS in hun keihruoina le Pathien kuomah hun hai inkawltirna neiin Pu Raltawnluoi Intovate in Sikpui Ruoi hun a hin Hmar hnam puonzar khaipar meuin thuhril tawi hun a hmanga, Inremna hi mitinin nei inla, inremna hi Pathien ditdan khawm a nih ti a hril zoin Silchar mipuihai kuomah lawmthu a hril a, iengkimah Hmar Welfare Society, Silchar an thlawpna, khawtlang le kohran ah an thlawp ṭhatna hai le Silchar a um Hmarhai inthuruol leia Silchar ah um sawng a nuom thu hrilin a chin-a lien officer le student tlangrawnga inza taka an inbiek thei hlak chu lawmum a ti hle thu hai a hril bawk.

Hi zo hin mipui hlasakna umin ‘Dar ang lengna’ ti hla sakruol le mipui a inthawk le HSA Silchar Branch a inthawk Tv. Peter L. Kungate, President, HSA, Silchar Branch-in thucha hrilna an neizoin Pu Isaac Faihriem, Adviser, HSA, Silchar Branch in thucha hrilna le hun khar ṭawngṭaina a neia, hi zo hin ditkhawp lo takin Sikpui Ruoi 2019 hmangna chu suktawp a nih. Hun hmang zo a ni hin mipui fekhawm ha’n thingpui dawntlangna an nei bawk.

Proceeding of 8th Hmar Inpui Assembly at VTI, Rengkai, CCpur on 12 & 13 February, 2016 hun a Agenda 3na dungzui chun Hmar hnam nunphung (culture) vawngzingna le suk hmasawnna dingin Sikpui Ruoi hi Hmar khuo tin annaw khawma Regional Headquarters a hai bek inser/hmang a ni theina dingin Hmar Inpui (Headquarters le Regional Headquarters) haiin hma la raw se ti le Resolution lungruoltaka rem ti a lo ni tah a nih.

Hi ang laizing hin ‘Sikpui Ruoi’ ti le ‘Sikpuiruoi’ tia ziek dan in anglo um el bakah hrietdan, ditdan le ngaidan a la’n kawkal nuk laiin Hmar Inpui 10th Assembly March 4 & 5, 2019 thurel Agenda 7na dungzui chun Sikpui Ruoi hi Hmar Inpui in kûtpui takin (Annual Festival) in puong sien, December ni 5 hi hnam pum huopa dinga inruolkhat taka hmang nisien, tia HSA, GHQ in a lo putlut tah le Resolution khawm Sikpui Ruoi hi Hmar Inpui in Hmar umna taphawt ah December ni 5 a inruoltlang taka hmang hlak a ni theina dingin hma hung la sien ṭha kan tih. Manipur Sawrkâr ah Hmar Inpui in holiday a puong dingin hma hung la sien kan tih, ti a nih.

Dec. 5 a Sikpui Ruoi hi Assam sawrkar le Hmar Inpui (Hmar Supreme House) meu hrietpui a lo ni tah leiin Sikpuiruoi le mani ditdan le ngaidan a lo hmang hai leh chu a hlutna a hung indang ta hle ding a nih.

Dec. 5 “Sikpui Ruoi” hi Assam ram po a chu Restricted Holiday dingin November 29, 2018 khan Assam Governor Order suokin a lo puong (declared) tah. Hi hmuna ding hin hnam sunga pawl dang dangin hun iemani chen a’nthawk khan an lo buoipui tah a, Hmar Welfare Society, Guwahati (HWSG) chun ṭhang nasa taka hung la tharin Order hi a hung suok tah a nih. Sikpui Ruoi (December 5) hi Karbi Anglong, Assam a District Council ah Sectional Holiday in 4th December, 1991 khan puong (declared) a lo ni tah a, chun Council Restricted Holiday dingin 3rd December 1994 khan puong a lo ni ta bawk a nih. Chun, NC Hills ah 1st December 1993 khan North Cachar Hills Autonomous District Council chun December 5 hi General Holiday in a lo puong ta bawk a nih. Hi le inzawm hin Hmar Inpui (Hmar Supreme House), General Headquarters chun hi ang a hung ni theina dinga hmalatuhai kuomah 2018 khan lawmthu a lo hril tah a nih.

– lrspuruolte@dec.5sikpui_ruoi

Loading

Comments

comments

Leave a Comment

Your email address will not be published.

Start typing and press Enter to search

Jai Hmarram!