Nuhmei ṭha ringum chu tu’m?

“Nuhmei ṭha ringum chu tûn am hmu thei a ta?
A hlutna chu lungmantamhai nêkin a’nsâng dai a.”

Ziektu: Thangsang

Tlangvâl lai chun dit zawng, ṭha ti zawng le hmangai kha a ṭhatak le feltaka a ruot a. Amiruokchu midang mithmua a lo ni ta chawk nawh. A famkim ei um naw a, sawiselna ding le hril sep sepna ding chu um vawng ei tih. Chu ngirhmun chu hre zing puma Thuvarhai ziektu khawma a ziek ni ngei a ta. Nuhmei nei tahaiin nuhmei ṭha ringum chu ka hmuh tithei iengzâm um ei ta? Nuhmei la neilo, ngaizawng neihaiin ka ngaizawngnu hi nuhmei ṭha ringum anih tu inam ti ngam a ta?

Mani ta chu inpâk seng ei ta, nisienlakhawm pansak, panthlang haiin an lungril taka an min pâkpui di’m? Nuhmei ṭha ringum hi an vâng hle chu ni ngei a ta, Thuvarhai ziektu khawma zawna lientak a pêk tlat el hih. An vâng lei tak hin lungmantamhai nêkin an hlutna khawm a’nsâng dai tiin a hrilsa nawk a. Nuhmei ṭha ringum nei fûk chu mi hamṭha tawpkhawk a nih. Thuvarhai 12:4 bawk chun “Nuhmei ṭha chu a pasal ta dingin lallukhum a na…” tiin a hril nawk ta deu deu. Lunghlu nêka hlu lem neitu le lallukhum neitu chu nuom a um ngawt el.

Thuvarhai 31:10 in nuhmei ṭha ringum hlutna le a tekhi lungmantam hi belchieng inla, lungmantam hrim hrim hi a tam ngai nawh. An mantamna san pakhat chu an vâng lei a nih. Khawvela lungmantamtak chu Diamond anih ei hriet seng, Diamond lem hi chu lung chang taka hriet a nih. Lungmantam po po hi an chang vawng kher nawa chu lung naran nêkin an chang lem tlangpui. Chun en ringawt khawmin an mawiin mit a lâkin, an rawng a nalin mit a suktlai hle. Lungmantam hi mitinin ei nei zo lo, ei nei phâk lo, ei nei theilo a nih.

Lung po po hin ṭangkaina an nei seng a, an ni tawka hlutna an nei seng bawk. Nisienlakhawm chuonghai po po chunga ngir chu jewellery a ei hmang lungmantam ei tihai hi an nih. Lungnaran le lungmantam hi bêlchieng nawk inla. Vadung lung a um a, rawllung a um a, a chang deu le an rawm deu khawm a um a. In bawlna ding, lamlien siemna ding le a hmang dan ding izir peiin lung chidang dang a um a, hieng lunghai hi a tamin, fena tieng tieng hmu ding a um. Phaiphin tamna rama ruok chu lung hi a vâng nawk thung, amiruokchu khawvel huopa hril chun lung hi a tam hin a tam hrim hrim. Lungmantam ruok chu mineral chikhat, hlawmkhat tawp ang huo (hmunhnawk dang ṭhanglo), lumtak le riktakin deldein a um huna, kum tamtak sung chuonga a um hnungin lunga hung insiengin, chuongchun lung mawitak, mihriemhai ta dinga lungmantama an hung inchang a nih.

Mihriem ei hung pienga, hringna ei nei ta hrim hrim chun hlutna ei nei seng a, hi kawnga hin ei hlutna an ang seng. Tisa rama la chêng ei ni tlat leiin tamtak chun hmêlṭhatna hi hlutnaa ngai, piengnalna hi hlutnaa ngai, hausakna hi hlutnaa ngai pawl le mani le mani lo inngaihlu ve tawp khawm ei phul inlêt. Nisienlakhawm Thuvarhai 31:10 in nuhmei hlu a ti ruok hi chu hmêl, pieng, hausakna le mani lo inngaihlu a kawk nawh. Nuhmei ṭha ringum chauh hi nuhmei hlu tia a’npâk khawp a nih. Hi taka hlu hi mihriem hlutna chunga mi a nih.

Tulai nunghâk tamtak hi an mit mengsângin (standard suksâng Sam 101:5; Thuvarhai 6:17), chapona le uongna (Thuvarhai 21:24) hi an kawl lien em em lei hin an inngaihlu bêk bêk a (Filipi 2:3). Hi hih an insuk hlut tum dân le hlu sawta an inngai dan a nih. Amiruokchu Lalpa ditzawng le rîlremzawng hrim a ni naw a, mihriem le Lalpa mithmua an nêp zuol deu deu lem a nih. Pathien thu hlak hi a lo kim dap dap el si a. Hieng ang mi haia inthawk invêng dingin nasataka inchuktir ei ni nawk thung. Thuvarhaia mi chapo le uong chu hmusittu (nuhmei khawm pasal khawm) a ti ang hrimin buoina, insel inhalna le inrem nawna an chawk suok ngun a, nisienlakhawm an thawsuolna an hmuin an hriet nuom ngai naw a, midang an intum. An inngaihlu leiin midang tlin nawna le tlâk nawna an hmu lien a, anni tienga an tlin nawna le tlâk nawna an hmu thei nawh. An ṭawng a zein an innêm hle a, nisienlakhawm a ril taka chu sai­ram khâkin a kha a (Thuvarhai 5:4). Hril ding le hril hun an hrietin, an inti varin, an inti hriet nuom khawpel. Nisienlakhawm inti var le inti hrie hrim hrim a var le a hrie an um nawh (Thuvarhai 9:13).

Nuhmei zangaithei chun inzaumna a kawl zing a, an bula um an hawiin thlamuong a um a, ngaino an bei. Hrietthiem le lungsietna neilo mihai ruok chun hausakna chauh kawltu, hmelṭhatna chauh kawltu, piengnalna chauh kawltu an nih (Thuvarhai 11:16). An puotieng hmêl tak thup dingin sam chei, kuttin chei, awm phawk, mawng phawk, makeup le inchei an thiem ang hin an mizie thup an thiemin, ṭha angin an inlang thiem a, nuhmeia nei rawktu chu an insung, u le nau kara indârna intluntu an hung ni a, chu ngei chu Pathien-in thil 7 a theida laia mi ngei a nih (Thuvarhai 6:19), chu thil inzapuium thawtu chu a pasal ruhai ta dingin inngena a nih. (Thuvarhai 12:4). Hmangaina hi mit suk del naw sien, na suksêt naw sien, sungkuoa insiem hmain hieng hmaikawr po po hi khawk pêk vawng hnunga hmangaina zâra hmu ṭha fawm ni lovin a nina hrima hin nuhmei ṭha ringum a tling am ti fie hmasatu chu a hringnun chanvea a hlawtling der tah ni ngei a tih. Lungmantam an sieng dingin hmunhnawk a ṭhang ngai naw angin hieng hmunhnawkhai bo a ni a ṭul ang bawkin nuhmei ṭha ringum nina ding chun bânsan le hne ding a tam hle.

Nuhmei ṭha ringum hi Kohran a inhmanghai, KTP a inhmanghai, naupang hotua inhmanghai, khawtlanga inhmanghai le thawkna neia hlaw neihai tina ani nawh. Lalpa Pathien ṭha tizawng chu thuhnuoirawl le lungrila inngaitlawmtak (Mathai 11:29), hrietthiemna ṭha neitu (Thuvarhai 4:5), inthununna le insûmtheina (Galati 5:23), pasal dang hlaka, sum thila thurûk tienga khawm nisien a ringum (Sam 31:23). Hieng ang nuhmei ngei hin a kuthaiin in ṭhiek lovin a kut chun in a bawl lem hlak (Thuvarhai 14:1). Lumtak le rik takin a dela inthawk lungmantamhai hi insieng an ni ang hrimin hieng thil zawm harsatak tak hai zawma, nun awlsamlo hrawtu, inthununthei, mihai ngaia chau hlaw khawma thaw hrâm hrâmna nuna inthawk chauh hin nuhmei ṭha ringum a suok a nih. Pathien rama a chung lem inchu an chunghnung ngai naw a, a hnuoi lem inchu A dawmkângin A si chunghnung lem thung. Chu Pathien ram chu ei nitin nun hi a ni zing.

Mihriem hlutna ei nei inangsengna thua a bultienga tarlanga lo um ta ang khan harsatna khawm mitinin mani tawka ei tuok le ei palhai hi harsa ei ti seng a. Nisienlakhawm harsatna tak tak ruok chu tamtakin an tuok ve nawh. Tamtak harsatna tuokhai hi anni le anni insuk harsa fawm, anni le an ni harsatna hmuna insi fawm, harsa lovah um thei zing laia harsa sa saa um ṭawk ṭawk thabo lei dam, inthunun naw lei dam, fimkhur naw lei dam le inchawm hmaa inchawmna ding en naw lei dam a nih. Hringnun bawkphêkpui khawp harsatna tuok le tuor lo hai chun a tuok le tuor tak tak hai tuorna an hril nêpin, an hrietthiem phâk ngai nawh. Field puoa inthawk ball pêt hai sawl dan ding hisapthei ani naw angin a tuor phâk lo hai chun sunlam le inhrilfihlim tumna ang chauha an ngai nuom viu. Chuong ang tuor ve phâk lo nu le pain an duot leia an duot suol nau hi in tin deuthaw ei kawl tawl fur. Nau duot suol, harsatna tak tak intem tir nuom lo leia harsatna hraw phâk lo, chu kakhawk leia hrietthiemna tlâksam, mani khawvel chite sunga chênga roreltu ni hih a pung hin ei pung deu deu, tulai ṭawng tak chun inti Princess deu deu hai hih. Nu le pa hin hmangaina zârin an umpuiin an duota chu hmangaina le thisen inzawmna um naw sien nu le pa vêk khawma an nghawk hle ding nau siem ei thiem deu deu. Nauhai le hmangaihai kuomah hmawl le kawkna hi inret ding hrim a um nawh, varna a pêk a nih (Thuvarhai 29:15). Chu varna chu lungril, mizie le nungchang ṭha le mawi a nih. Mâkpa ṭha dit seng ning ei tih, nau duot suol chun mâkpa ṭha a kuoi dawk ring a um nawh.

Lungmantamhai chu en ringawt khawmin an mawiin mit an lâkin, an rawng a nalin mit a suktlai hle ang hin nuhmei ṭha ringum chu an hringnun a mawiin, an nunchang le mizie a mawiin, hrietthiemna hau le an lungrila tlawmna nunin lungril mit a suktlai hle a. Mitin nei zo lo le nei phâk lo lungmantamhai anga nei harsa a na. Chuong ang neithei ding chun pasal khawm chu ang mi chu a ni ve a ṭul. Chuleichun tulai hun nuhnunga kawppui la zawnga, la hung nunghâk tlangvâl dinghai hin thil umzie hi ngun taka thlirin, a pasal a nuhmeiin Pathien thu nêka mihriem thu le mihriem ditdan inlalna le ngaiven hlaw lemna rama hin tunam nuhmei ṭha ringum lungmantamhai nêka hlu lem chu hmu zo tâng a ta?

Comments

comments